Ruth Montgomery-Andersen Kalaallit Nunaanni Isiginnaartitsisartunngorniarfimmi pisortanngorpoq, taamaalilluni augustimi 2018-imi isiginnaartitsisunngorniarlutik aallartittut ilinniartuutigilerlugit.

Ruth Montgomery-Andersen, januaarip aallaqqaataat aallarnerfigalugu pisortanngortoq qitittartutut ilinniagaqarpoq, piorsarsimassutsimillu peqqinnissamut sammivilikkamik qaffasissumik ilinniagaqartuulluni. Ruth suliniutinik aqqutsinermik, ilinniagaqarnermik – piginnaasalinnillu ineriartortitsinermik ukiorpassuarni ingerlatsisimanermigut misilittagarqarluarpoq.

– Ilinniartuutigut pikkorissut peqatigilernissai qilanaaraakka, ilinniarfimmilu isiginnaartitsinikkut nukittorsaallungalu qaffasinnerusumik ilinniakkanik ingerlatsisinnaanissaq inerisassavara, Ruth Montgomery-Andersen tusagassiutinut nalunaarut malillugu taama oqaaseqarpoq.

Nunatta Isiginnaartitsisarfianilu pisortaq, Susanne Andreasen ima nangippoq:

– Nunatta Isiginnaartitsisarfiani Ruth Montgomery-Andersenip suleqatigilernissaa qilanaareqaarput‚ ilinniarfimmilu anguniakkanik siunniussatsinnik ingerlatsileruni misilittagarpassuarminik atuilernissaa pissangagalugu. Isertuukkusunngilarput pilersaarutigigatsigu ilinniakkap ukiumik ataatsimik sivitsornissaa qaffasinnerusumik angusaqarfiulerniassammat, bachelorinngorfiusinnaanngorlugu. Imaanngilaq atuagarsornerinnakkut ilinniartitsinialersugut, nunarsuulli sinnerani pissutsinut sanilliussinnaajumalluta taamaalerusuppugut, ilinniartuutigut ilinniagaqaqqissinnaanissaannut periarfissikkusullugit, misilittagaat annertuserusullugit naammassinerminnilu isiginnaartitsisartutut eqqumiitsuliortutut inuussutissarsiuteqarsinnaalernissaannut periarfissanut aqqutissiuukkusullutigit.

Ruth Montgomery-Andersenop pisortaasimasoq Varste M. Mathæussen taarserpaa, taanna nammineerluni aalajangerpoq ukiup naanerani pisortaajunnaassalluni.

Kommentariigit

© Alle rettigheder forbeholdt Nunatta Isiginnaartitsisarfia, 2018 Powered by Nuna Media Designs.