Ronja piiaasup paniata angallannera iluatsilluartoq

Nunatta Isiginnaartitsisarfiata, Nunatta Isiginnaartitsinermik Ilinniarfiata kiisalu Islandip isiginnaatsitsisarfiata suleqatigiillutik Ronja piiaasup paniata angallannera naammassivaat. Angalanerlu iluatsilluarsimaqaaq illoqarfinni tikitani inuppassuit isiginnaariakaasimallutik.

Angalanermi aqutsisoq Gerth Lyberth angalaneq pillugu ima oqaaseqarpoq:

”Angalanermi illoqarfiit sisamat tikippagut. Taakkunani atuartunut takutitsinerit sisamat kiisalu tamanut isiginnaartitsinerit sisamat takutissimallutigit. Tamanut takutitsinerni inissat tamatigut ulikkaartarput, ilaatigut isinngitsoortoqartarluni, malunnarpoq sineriammi isiginnaagassiatta soqutigineqaleraluttuinnarneranni isiginnaartitsiviusartut mikivallaalersimasut.

Isiginnaartitsisarfiup pisortaa Susanne Andreasen ima ilaliivoq: Nunarput tamakkerlugu isiginnaagassianik pisariaqartitsisoqartoq malugisinnaavarput, tassami illoqarfinni tikitatsinni isiginnaartitsinerni isissutissat tamarmik nunguttarput inillu takutitsiviusartut mikivallaalersimallutik. Taassumalu malittaanik illoqarfinni assigiinngitsuneersut oqaloqatingaangut aaqqiissummik nassaarniarluta. Assersuutigalugu angalanermi tullermi illoqarfinni tikitani isiginnaartitsinerit amerlanerunissaat eqqartorparput taamaalillutalu isiginnaariat amerlanerusut angusinnaassallutigit. Isiginnaagassiamik angallassilluni akisusarmat illoqarfiit nunaqarfiillu tamakkersinnaaneq ajorpagut, taamaattorli isiginnaagassianik angallassinerni nunatta sineriaai tamakkerniarsarisarpagut.”

PAASISSUTISSAT:

Ronja piiaasup pania nuummi takuteqqaarneqarpoq 22. februar. Nuummilu takutinneqareermat 1. marts angalaneq aallartippoq illoqarfiillu ukua takutitsiffigineqarput.

Nuuk               Isiginnaariat 550

Ilulissat            Isiginnaariat 301

Aasiaat            Isiginnaariat 400

Sisimiut            Isiginnaariat 424

Maniitsoq         Isiginnaariat 218

Isiginnaartitsinerup ingerlanerani isiginnaariat katillugit 1893-iupput, angalanermilu isiginnaariat 1343-ruupput.