HOMO sapienne isiginnaartitsissutitut
Seneste Nyheder

HOMO sapienne isiginnaartitsissutitut

TUSAGASSIORFINNUT NALUNAARUT

2014-imi atuakkiaq HOMO sapienne Niviaq Korneliussenip saqqummersimmagu assut soqutiginninnermik pilersitsivoq – eqqortumillu. Kalaallini pissusiviusumit oqaluttuarisamik kalaallit oqaasii atorlugit inuusuttunut atuakkassaaleqineq atuakkiap immersuiffigaa.

Siullermik pingaarnermillu tassaavoq asanninneq, kinguaassiuutinik atuisinnaassuseq, inuusuttuussuseq, kinaassuseq, suiaassuseq, imminik nassaariniarneq, ikinngutigiinneq aammalu inuiaqatigiinnit nalilersorneqarneq pillugit atuakkiaq.

Maannakkut atuakkiaq tunngavigalugu Nunatta Isiginnaartitsisarfia isiginnaartitsissusiorpoq, Isiginnaartitsisarfiullu pisortaata oqaatigineratut tassaavoq isiginnaartitsissut pingaaruteqartoq.

”Siullermik pingaarnermillu tassaavoq allagaq pitsaalluinnartuusoq! Atuakkiamiipput pisut sakkortuut, misigissutsit annertuut, inuttasi soqutiginartut ajornartorsiutillu paasiuminaatsut. Inuusuttut oqaasiinik atuivissorpoq, taakkulu pimoorunnissaat pingaartuuvoq. Inuusuttortatta kisimik nunarsuarmi ajornartorsiuteqarlutillu misigissuseqartuunnginnerat oqaluttuarissavarput, ilaatigullu isiginnaartitsisarfikkut taamaaliorsinnaavugut,” Susanne Andreassen oqarpoq.

”Ukiormanna inuusuttut taakku, tassalu 15-init ukiullit immikkut sianiginiarpagut, isiginnaartitsissummik matuminnga, allamillu takkuttussamik. Isiginnaartitsissutitta allat ilaasa taakkuninnga saaffiginninniarneq ajornakusoortippaat, unali taakkununnga immikkut ittumik saaffiginnittuuvoq.”

”Atuakkiaq maannakkut oqaatsit qulingiluanik ikinnerunngitsunut saqqummersinneqarpoq, tassaallutik: kalaallisut, qallunaatut, franskisut, tuluttut, tjekiiamiutut, norgemiutut, svenskisut, islandimiutut aamma tyskisut. Nunarsuarmi sumiiffinni assigiinngitsuni isiginnaartitsisarfiit arlallit soqutiginnissimapput, arlallillu allassimasaanik atuffassisarsimapput. Taamaattumik atuagaq tunngavigalugu isiginnaartitsissummik tamakkiisumik nunarsuarmi isiginnaartitsisarfinni siullersaalluta saqqummiussaqarsinnaanerput, aammalu inuttarpianik Niviaq Korneliussenimik qanittuaqqamik suleqateqarluta taamaaliorsinnaanerput immikkut ittumik tulluusimaarutigaara,” Isiginnaartitsisarfiup pisortaa naggasiivoq.

Isiginnaartitsissut Nuummi apriilip 26-anni, 27-anni aamma 28-anni takutinneqassaaq, kingornatigullu makkununnga angalaartinneqarluni: Nanortalik, Qaqortoq, Narsaq, Paamiut, Maniitsoq, Sisimiut, Aasiaat, Qasigiannguit, Qeqertarsuaq aamma Ilulissat

Ukiunut makkununnga naleqquttoq: 15-inik ukiulinniit angajullernullu
Oqaatsit atukkat: kalaallisut
Sivisussusia: minutsit 90-it missaat

Ingerlatseqatigiit
Dramatikeri: Niviaq Korneliussen
Dramaturgitut suliarinnittut:
Hanne Trap Friis, Susanne Andreasen
Ilitsersuisoq:
Hanne Trap Friis
Isiginnaartitsisartut: Arnaq Petersen, Hans-Henrik Poulsen, Connie Kristoffersen, Najattaajaraq Joelsen, Ujarneq Fleischer
Scenograf aamma kostumier: Naja Rosing-Asvid
Nipilersuusiortoq aamma nipimik iluarsaasartoq: Hans-Ole Amossen
Qaammaqqutissanik iluarsaasartoq teknikkillu tungaatigut ingerlatsisoq:
Gerth Lyberth
Grafiskinik suliat: Gerth Lyberth
Isiginnaartitsissusiornermut siulersuisoq: Manasse Berthelsen
Isiginnaartitsissusiortoq: Nunatta Isiginnaartitsisarfia

Tusagassiutinut attaveqaat / Pressekontakt: Isiginnaartitsisarfimmi pisortaq / Teaterchef Susanne Andreasen tlf.: 38 13 76 e-mail susanne@nuis.gl