Festivali angalatitaq illoqarfinni tikitani tamani najugalinnik peqataatitsillunilu pikialaartitsiffiussaaq – tassa suliniutip KIINNAT FESTIVAL 2021p siunertaa.

KULTURIKKUT PAARLAASSEQATIGIINNEQ:

”Erinarsorfigissagukkit erinarsorfigissavarma imaluunniit pikkoriffinnik allamik takutinnga: kaagiliorit, immaqa aanaat erinagissoq aamma nassarsinnaavat; immaqaluunniit hiisterneq,  traktorinik ingerlatsitsineq ulikattarnerluunniit takutissinnaavatit – kakkaffitit apeqqutaaginnarput. Hiisti histiusaassaaq nersussuaasaarnani. Aqqusinermimi sanertoq sanertarput uleqattaarnani, sanillaqqippormi. Saneriallaqqippoq; misiglittarnikooqigamiuk.”  Issuaaneq uanngaanneerpoq:THE THEATER OF RECIPROCITY Kai Bredholtip Nordisk Teaterlaboratorium – Odin Teatret

” Nunatta Isiginnaartitisisarfia (Grønlands Nationalteater) 2021mi ukiunik qulinngortorsiussaaq, tassungalu atatillugu pisussat killormullusooq pitinniarpavut – tassa isiginnaagassiamik ineriikkamik sinerissamut angallassissanngilagut, sumiiffinnili Kalaallit Nunaanni tikitatsinni tamani innuttaasut peqatigalugit isiginnaagassiussaagut, takutitassiorluta pikialaartitsillutalu.” Nunatta Isiginnaartitsiviani pisortaq Susanne Andreasen oqaluttuarpoq.

Suliniut Kiinnat Festival 2021imik taaguuserneqartoq isiginnaartitsisartoqatigiinnit Nordisk Teaterlaboratorium – Odin Teatretip kulturikkut paarlaasseqatigiissitsisartut isumassarsiaraat – nunarsuarmi ukiorpassuarni angallassimallugu. Ukiuni qassinimmita? Suliniut taamaasilluni isiginnaartitsisartoqatigiit pineqartut Nunattalu Isiginnaartitsisarfiata qanimut suleqatigiissutigisussanngorpaat. Siunertaavoq sinerissami tikitani sunngiffimmi kiffartuussiviit, kulturikkut illut assigisaasalu attavigiilersinnissaat.

”Ataatsimoorussamik suliniuteqarnitsinni innuttaasut peqataatilluinnassavagut, ataqatigiinermik, tulluusimaarnermik nuannaarnermillu kinguneqartitsisussamik”, Susanne Andreasen oqarpoq.

Per Kap Bech Jensen Nordisk Teaterlaboratorium – Odin Teatretmi isiginnaartitsivimmi 2021-mi pisortanngortussaq, nunarsuarmi tamarmi kulturikkut pikialaartitseqatigiinnernik misilittagaqarluarpoq, Kalaallit Nunaannilu aatsaavissuaq suleqateqarnissani qilanaara:

”Kalaallit Nunaanni pilersitserusuttorpassuaqartoq piginnaanilinnillu ulikkaartoq nalunngilarput, taamaammat suliniummi tamanik peqataatitsineq nukittoqutaassaaq. Inuit tamarmik arlaatigut piginnaaneqarnerat tunngavigaarput – namminerpiaq pikkoriffigisaminnik! Isiginnaartitsisartut angalaqataasussat siunnersuisuussapput peqataasussat kakkaffii saqqummertinniarlugit. Nunani siornatigut tikissimanngisatsinni pikialaartitsigaangatta nutaanik ilikkagaqartarpugut, pissangaqaagut paarlaasseqatigiinnssatsinnut.”

Nunatta Isiginnaartitsisarfia aamma Nordisk Teaterlaboratorium – Odin Teatret tamarmik immikkut inuussutissarsiutigalugu eqqumiitsuliortunik, isiginnaartitsisartunik nipilersortartunillu aallartitaqarlutik Kalaallit Nunaanni illoqarfiit 17t tikissavaat: Qaanaaq, Upernavik, Uummannaq, Ilulissat, Qeqertarsuaq, Qasigiannguit, Aasiaat, Kangaatsiaq, Sisimiut, Kangerlussuaq, Maniitsoq, Paamiut, Narsaq, Qaqortoq, Nanortalik, Tasiilaq aamma Ittoqqortoormiit – tamarmik pikialaartitsiffiusussat. Angalareernerup kingorna Nuummi pikialaartitsinersaarsuaqaassaaq nuna tamakkerlugu peqataaffigineqartussamik, qaaqqusanik minnerunngitsumillu illoqarfiit 17t aallartitaannik.

Suliniut 2020mi juunimi aallarteriissaaq – eqqumiitsuliornermik suliallit Kalaallit Nunaanneersut Holstebro Festugemi peqataanissamut Nordisk Teaterlaboratorium – Odin Teatretmit qaaqqusaasimammata. Tassani misilittakkanik paarlaasseqatigiittoqassaaq ataatsimiinnerillu arlallit pinissaat pilersaarutaapput.  Suliffeqarfiit, peqatigiiffiit aamma Holstebro Kommunemi immikkoortortat suleqatigiinnerisigut piviusunngortitat Kalaallit Nunaanneersut suussusersiumaarpaat.

”Immersorneqarnitsigut suleriaatsinillu avitseqatigiinnitsigut 2021mi suliniutissatsinnut piareersassaagut”, Susanne Andreasen naggasiivoq.

Attavissat – Suliffeqarfiit inuillu

NORDISK TEATERLABORATORIUM  – ODIN TEATRET Per Kap Bech Jensenimit siulersorneqartoq Per@odinteatret.dk Særkærparken 144 7500 Holstebro Danmark Tlf. (+45) 97 42 47 77 Email: odin@odinteatret.dk http://www.odinteatret.dk

Nunatta Isiginnaartitsisarfia (Grønlands Nationalteater) Isiginnaartitsisarfimmi pisortaq Susanne Andreasen Industrivej 27 – Postboks 1627 – 3905 Nuussuaq – Grønland Tlf. +299 381370 E-mail: info@nuis.gl   www.nuis.gl

Kommentariigit

© Alle rettigheder forbeholdt Nunatta Isiginnaartitsisarfia, 2018 Powered by Nuna Media Designs.