| Nunatta Isiginnaartitsisarfiani Nunatta Isiginnaartitsinermik Ilinniarfiata, isiginnaartitsinermik ilinniarneq ”Bachelor of Fine Arts in Acting” massakkut atuuttumit qaffassaasussatut innersuusiaq Ilinniartitaanermut, Kultureqarnermut Ilageeqarnermullu Naalakkersuisumut tunniuteqqammerpaa
”Nunani Avannarlerni Amerikallu Avannaani, isiginnaartitsinermik ilinniartitaanerit ukiuni pingasuni bachelorinngorniarfiusumik ilinniarfiupput. Nunatsinni isiginnaartitsisartut ilinniakkaminnik qaffassaqqissinnaanerat maannamut periarfissaanngilaq. Bachelorinngorniarluni ilinniarneq periarfissaalerpat, ilinniartuutigut nunani allani isiginnaartitsisartunngortussanut unammillersinnaanerulissapput atorfeqarsinnaassutsikkullu periarfissagissaarnerulissallutik”, Nunatta Isiginnaartitsinermik Ilinniarfiata pisortaa Ruth Montgomery-Andersen oqarpoq. Isiginnaartitsisarfimmi pisortaq Susanne Andreasen ilaliivoq oqarluni ”Isiginnaartitsinermik Ilinniarfimmi qaffasissumik anguniangassinnikuuvugut. Naak isiginnaartitsisunngorniarneq ullumikkut ukiunik marluinnarnik sivisussuseqaraluartoq, inuussutissarsiutissatut ilinniarneruvoq, nunatsinni kulturikkut kingornussat tigussaanngitsut tunngavigalugit nunarsuatsinnilu isiginnaartitsinermi sammiviit (teoriit) akuerisaasut atorlugit ilinniarfiusoq. Ukiut ingerlanerini ilinniarfiup iluani piginnaasaqaleriartornerput aallaavigalugu Kalaallit Nunaanni eqqumiitsuliornerup iluani bachelorinngorniarsinnaalernissaq siulliusussaq angusinnaanngorsimavarput.” Naalakkersuisut innersuussut tigusimalerpaat imarisaatigullu nalilersuinissaq aallartisassallugu. Innersuussut akuerineqarluni ingerlaqqissappat tullinnguutissaaq isiginnaartitsisartunngorniarluni ilinniarfimmut nalunaarutip atuuttup nutarterneqarnissaa. Pitsaassutsimik qaffassaaneq Ilinniartitaanermut Siunnersuisoqatigiit siulittaasuat oqarpoq: ”Assilialiornermi bacheloritut nammineq ilinniagaqarpunga, tamannalu nutaanik pilersitsiniarluni ilinniaqqissinnaanernut kulturilerisutullu suliaqarsinnaanissamut nunatsinni nunattalu avataani ammaassisuungaatsiarsimavoq. Kalaallit Nunaanni eqqumiitsuliornerup kulturilerinerullu inuussutissarsiutitut qaffasissumik ilinniarfiulerneratigut eqqumiitsuliortunut (isiginnaartitsisut, assilialiortartut, nipilersortartut il.il) aamma pitsaassutsimik qaffasinnerusumik inerititsisinnaanissamik pisussaaffiliissaaq taamaattumik neriuutigaarput innersuusiatta ilippannarluartuunera oqartussaniit maluginiarneqarluarumaartoq. Isiginnaartitsisunngorniarnerup qaffanneqarneratigut eqqumiitsuliornerup iluani ilinniakkani allani qaffasinnerusumik ilinniarsinnaalernissanut aqqutissiueqataajumaarpoq”. |
| Isiginnaartitsinermik Ilinniarfiup erseqqissaatigaa, ilinniagaq innersuussutaasoq tassaammat eqqumiitsuliornikkut ilinniagaq – ilisimatusarnikkut ilinniarfiunani. Eqqumiitsuliortutut bachelorinngorniarneq professionsbachelorinngorniarluni ilinniakkanut assersuunneqarsinnaavoq aamma ilinnialerniarluni piumasaqaatinut massakkut atuuttunut allannguuteqarffiussanngimmat. Ilinnialerniartut pisarnertut misilitseqqaartassapput. Ilinnialerusuttunut ilinniarnertuunngorsimanissamik suli piumasaqaatitaqarfiussanngilaq.
Qinnuteqarnissamut killigititaq Paasisaqarnerorusukkuit una alakkaruk www.nuis.gl |
PAASISSUTISSAT:
- Nunatta Isiginnaartitsisarfiani Nunatta Isiginnaartitsinermik Ilinniarfia 2012-imi aallartippoq. Ilinniarneq inuussutissarsiutigalugu ilinniarneruvoq. Ilinniarneq 120 ECTS-points-inik naliligaavoq ukiuni marlunni ilinniarfiusoq.
- Amerlanerpaamik ilinniartut tallimat ukioq allortarlugu tiguneqarsinnaapput. Ilinniartut maannamut 13-it naammassereerput, siulliit 2014-imi naammassillutik.
- Bacheloritut ilinniarsinnaalernissaq (BFA -kunstnerisk bachelorgrad (180 ECTS-pointinut naleqartoq)) nunani allani ingerlaqqiffiusumik eqqumiitsuliornikkut ilinniarfiusinnaasunut allat assigalugit ingerlasussatut inissinneqartussaavoq. Nunani tamalaani qaffasinnerusumik ilinniarfiusut Europamilu ingerlaqqiffiusumik ilinniarfinni piumasaqaataasut qaffasseqatigissallugit. Taamaalilluni innersuussut aallaavigalugu nunatsinni isiginnaartitsisartutut ilinniartunngortussat nunani allani ilinniaqqinnissamut periarfissaqalissapput.
- Nunatta Isiginnaartitsinermik Ilinniarfiani Ilinniartitaanermut Siunnersuisoqatigiivini ilaasortaapput, siulittaasoq Arnajaraq Støvlbæk, Namminersorlutik Oqartussanit toqqagaasoq, ilaasortaappullu AneMarie Ottosen, SILAmit toqqagaasoq (Kalaallit Nunaanni isiginnaartitsisartut peqatigiiffiat) aamma Steinunn Hildigunnur Knúts Önnudóttir, Danmarkimi Isiginnaartitsisartut Peqatigiiffiannit toqqagaasoq.
Attavissaq: Susanne Andreasen, susanne@nuis.gl Tlf. 381376
Assiliisoq: Edvard Lyberth-Mørch (Nunatta Isiginnaartitsisarfia)
Assitaliussami oqaasertassat: Isiginnaartitsinermik Ilinniarfimmi pisortaq Ruth Montgomery-Andersen inassuteqaammik allaganngorlugu Carl Egede Bøggild-imut (Ilinniartitaanermut, Kulturimut Ilageeqarnermullu Naalakkersuisoqarfimmi Immikkut Siunnersorti) tunniussivoq.
