A.P. Møller Fonden, Augustinus Fonden og Færchfonden-illu millionilikkaanik tapiissuteqarnerisigut isiginnaartitsiviit pineqartut marluk suleqatigiillutik ukiuni 2021 – 2024 Isiginnaagassiortassapput isumannatsitsisinnaasunik nutaaliaasunillu nunatsinni Danmarkimilu saqqummertartussanik. Suliniut aallartinneqarpoq Nordisk Teaterlaboratorium-imit – Odin Teatret-ip ataani ingerlasumit.
Danmarkimi tapiisartut sunniuteqarluarnerpaat ilaannit tapersersorneqarluartumik aallaaveqarlutik Nunatta Isiginnartitsisarfia (KAL) Nordisk Teaterlaboratorium – Odin Teatret (DK) immikkuullarissumik suleqatigiissusiorput – silarsuarmi tuniluuttumik nappaalasoqaleruttorfiani – Corvus Corax 20XX-imik qulequtsikkaminnik, ukiuni tulliuttuni sisamani ingerlasussamik.
Nunatta Isiginnaartitsisarfiata pisortaa, Susanne Andreasen, oqaaseqarnermini oqarpoq: “Nordisk Teaterlaboratorium – Odin Teatret-i ukiuni arlaqaqisuni nunani tamalaani suliniuteqartarneq misilittagaqarfigingaatsiarpaat aamma sumiiffimminni innuttaasunit suliaat soqutigineqarluarlutillu malinnaavigineqarluartuupput minnerunngitsumillu isiginnaagassioriaatsit assigiinngitsut atorlugit suleriaaseqarnerat iluatigalutigut ilinniagaqarfigerusussimavarput. Ukiuni qulinngortuni Nunatta Isiginnaartitsisarfiatut misilittagaqalereersimavugut, taamaammallu aamma isiginaartitseriaatsinut isersimallualereersimalluta, isiginnaagassioriaatsit ilaatigut ODIN-ip isiginnaartitseriaatsinut atugaannut qanissinnaasunik periutsinut atuisuunitsigut periusaat ilisimalluarpagut, taamaammat suleqatigiissusiorsimanerput massakkut tunngavissaqarluarpoq. Uatsitulli aamma taakku isiginnaartitsisartui assigiinngiiartumik isiginnaartitsisinnaalluarput Holstebro-rmiut ilagalugit isiginnaartitsisartutta pisinnaasaat atorluarlugu nutaaliorluta pilersitseqatigiinnissinnaanissarput qilanaaraarput.
Nordisk Teaterlaboratorium – Odin Teatret-ip pisortaa, Per Kap Bech Jensen ilaliivoq: “Nordisk Teaterlaboratorium – Odin Teatret-imut Nunatta Isiginnaartitsisarfianik suleqateqalernera misilittagassarsiorfiusussaavoq tamatsinnut, pissanganarluinnartoq. Naak nunarsuarmi nunat 33%-iisa missaat tikereersimagaluarlutigik suli Odin teatret Kalaallit Nunaannissimanngilaq. Nunatta Isiginnaartitsisarfiata isiginnaartoqartartui immikkuullarilluinnaqqissaartumik tusind kilometerip amerlaqisuni siammarsimapput nunamiillunilu immikkuullarilluinnartumik pinngortitaqaannarani oqalualaatigut kulturikkullu immikkuullarilluinnartumerersunit, tamanna peqataanitsigut isiginnaagassiorfigeqataaffigissallugu minnerunngitsumillu misigisaqarfigissallugu assut qilanaaraarput. Suliniutip aqqa Corvus Corax aallaveqarpoq tulukkap Kalaallit Nunaanni Danmark-imilu uumasuusutut immikkuullarissutut maluginiarneqartarnera, soorluttaaq Hugin (eqqarsaat) og Munin (eqqaamasaq) aamma taamaattut. Suleqatigiinnerput silarsuit naapinneranni paasisanik nutaanik pilersitsiinnarani aamma isiginnaartitsisarfitta iluanni ataavartumik kammaagiinnermik inerititsiviussasoq neriuutigaarput”
Aaqqissuutassatsinnut amerlaqisunut pilersaarusiornerit massakkut sivitsortumik ingerlareersimalerput. Oktober-imi suleqatigiinnerput aallarnerlugulusooq takutitsisoqassaaq. Nordisk Teaterlaboratorium – Odin Teatret-i ukiuni 50 qaangerlugit pioreerluni siullerpaamik Nuummut isiginnaartitsiartussaaq. Nunatta Isiginnaartitsisarfia aamma Holstebro-mut isiginnaartitsiartussaaq, taassumalu kingorna isiginnaassiaq Dk-mi assigiinngitsuni takutinneqariartussalluni.
Corvus Corax latinerisut tulukkamut silassorilluaqqinnaartumut taaguttaavoq, kalaallit qallunaallu oqaluttuatoqaanni ilaalluinnarluni nunallu marluk isiginnaagassiornikkut suleqatigiilerfianni ileqqutoqqanit aallaveqartumik siunissamullu isigisumik sulinermi toqqammavigineqassalluni. Suliniummi assigiinngiiaartunik aaqqiissuussisaqattaarnissaminni misilittakkat isiginnaartitsisarfiit marluk immikkut kulturikkut aallaavigisaannit tunngaviligaassaapput nutaaliornikkullu periutsinik nutaanik isiginnaagassioriaatsitigut suleqatigeeriaatsinullu pilersitsinissamut toqqammaviliissalluni. Anguniagaavoq suliniut ataavartumik patajaatsumillu isiginnartitsisarfiit pineqartut akornanni suleqatigiittoqalernissaanik. Minnerunngitsumik Aarhus universitet aqqutigalugu malinnaatitsisoqassaaq ilinniakkat univerisitet-imi pineqartumi aallunneqartut aallaavigalugit.
Ukiut sisamat tulliuttut suleqatigiissutaasussat ukuussapput:
1) Piffimmi piginnaasat aallaavigilluinnarlugit peqataatitsisumik festival’ertitsinerit Kalaallit Nunaanni Danmarkimilu, kulturikkut paarlaasseqatigiinneq tunaartaralugu, suliarlu isiginnaartitsiviit pineqartut marlunniit isiginnaagassiortut aallaavigilluinnarlugit suliniutaasassallutik, piffimmi eqqumiitsuliortut Danmarkimeersut nunatsinneersullugu suleqatigalugit.
2) Isiginnaagassiat paarlakaattumik DK-mi nunatsinnilu isiginnaartitsissutigineqartassapput.
3) Isiginnaagassioriaatsinik misileraavittut taallugu kulturikkut paarlaasseqatigiinnerit ingerlassassapput isiginnaagassioriaatsillu ineriartortitsiviusussatut sulissutigineqassapput ilaatigut Aarhus Universitet-imit paasissutissanik misilittagarilikkanillu katersorneqarfiussalluni nalilersuiffiussallunilu.
4) Nukittorsaaqatigiittumik suleqatigeeriaasiusussat nutaat inerisarneqassapput ukiuni sisamani suleqatigiinnissamut toqqammavissatut atorneqartussat.
