Nunatta Isiginnaartitsisarfiani nuannaarutigeqisatsinnik Nunavumeersut tikeraarlutik takutissavaat ”Kiviuq Returns”.

Kiviuq tassaavoq naggueqatigiit Inuit oqaluttuatoqaataanni tusaamasarsuaq, ingerlaartuartoq. Isiginnaagassiaralugu oqaluttuareqqinnerani Kiviuq qaannaminik ingerlaarpoq… ajorsaqqalluni killuutigisaasimallunilu… Uumasut isikkuminnik allannguisinnaasut naapittarpai, ilaatigut angakkuakkatullusooq isikkullit, quianarsinnaasunik kiisalu killuussigajuttutut pissusillit. Toornani aggersarpai angerlamut apuussinnaajumalluni. Inuillu oqaluttuatoqaanni oqaatigineqartarpoq Kiviuq angerlamut apuutsinnani toqussagaluarpat Inuit tamarmik nunamiit tammassasut.

”Kiviuq Returns” tassaavoq isiginnaagassiaq isiginnaartitseriaatsit assigiinngitsut atorlugit isiginnaagassiaq akunnermik ataatsimik sivisussuseqartoq. Oqaluttuamilu Inuit nipilersoriaasaat, qilaatersortarnerat, atisalersoriaasaat minnerunngitsumillu utoqqaat oqaluttuariaasaat atorlugu nutaaliaasumik oqaluttuarineqarpoq, angutip tusaamasap piffissat ingerlanerani sapiitsuliornera aliasuuteqarneralu malittarineqarput.

Isiginnaagassiamik pilersitsisut tassaapput Qaggiavuut – Nunavumi eqqumiitsuliornikkut kiisalu piorsarsimassutsikkut ataatsimoorfimmi Inuit isiginnaartitsisarnerannik nukittorsaaniarlutik suleqatigiissut.