ILINNIARTITAANERMI SIUNNERSUISOOQATIGIIT

KALAALLIT NUNAATA ISIGINNAARTITSISARFIA ISIGINNAARTITSISARTUT ILINNIARTITAANERMI SIUNNERSUISOQATIGIIT

Kalaallit Nunaata Isiginnaartitsisarfiani isiginnaartitsisartutut ilinniartitaanermut siunnersuisoqatigiit pillugit Namminersorlutik Oqartussat nalunaarutaat nr. 22, 16. december 2010-meersoq atuarsinnaavat

Isiginnaartitsisarfeqarneq pillugu Inatsisartut inatsisaanni nr. 23-mi, 18. november 2010-meersumi § 11, imm. 2 naapertorlugu aalajangersarneqarput::

Katitigaaneq

§ 1
Ilinniartitaanermut Naalakkersuisoq ilinniartitaanermut siunnersuisoqatigiinnik isiginnaartitsinermik ingerlataqarnermi ilinniartitaanermut tunngasunik ilisimasaqartunik suliatigullu ilisimasalinnik inuttaqartunik pilersitsissaaq.

§ 2
Ilinniartitaanermut Siunnersuisoqatigiit pingasunik ilaasortaqarput:
1) Ilaasortaq ataaseq ilinniartitaanermut naalakkersuisoqarfimmit toqqarneqartoq.
2) Ilaasortaq ataaseq Kalaallit Nunaanni isiginnaartitsisartut kattuffiannit toqqarneqartoq.
3) Ilaasortaq ataaseq Statens Teaterskolemit toqqarneqartoq.
Imm. 2. Ilaasortaq ilinniartitaanermut naalakkersuisoqarfimmit toqqarneqartoq siunnersuisoqatigiinnut siulittaasuuvoq.
Imm. 3. Ilaasortat ukiunut sisamanut qaammatisiutit ukiuannik malinnaaviusunut toqqarneqartassapput. Ataasiarluni toqqagaaqqittoqarsinnaavoq.
Imm. 4. Kalaallit Nunaata Isiginnaartitsisarfia Siunnersuisoqatigiinnut allattoqarfiuvoq Siunnersuisoqatigiillu sulinerannut atasumik aningaasartuutit Kalaallit Nunaata Isiginnaartitsissarfianit akilerneqassapput.

Atuunnera

§ 3
Isiginnaartitsisartutut ilinniartitaanerup pitsaassusiata qularnaarneqarnissaa Ilinniartitaanermut Siunnersuisoqatigiit suliassaraat.
Imm. 2. Ilinniartitaanermut Siunnersuisoqatigiit isiginnaartitsisartutut ilinniartitaanerup pitsaassusianik qularnaarisarnerat pisassaaq:
1) § 4 naapertorlugu isiginnaartitsisartutut ilinniartitaaneq pillugu malittarisassatut siunnersuutit pillugit oqaaseqarnikkut.
2) § 4 naapertorlugu isiginnaartitsisartutut ilinniartitaanermut ilinniagassatut aaqqissuussinernut siunnersuutit pillugit oqaaseqarnikkut.
3) § 5 naapertorlugu isiginnaartitsisartutut ilinniartitaanermik ingerlaavartumik naliliisarnikkut.
4) § 6 naapertorlugu isiginnaartitsisartutut ilinniartitaaneq pillugu malittarisassanut kiisalu
5) § 7 naapertorlugu isiginnaartitsisartutut ilinniartitaanermut ilinniagassatut aaqqissuussinernut allannguutissatut tunngavilersuusikkanik siunnersuuteqarnikkut.

§ 4
Siunnersuisoqatigiit isiginnaartitsisartutut ilinniartitaanermut siunnersuutit kiisalu isiginnaartitsisartutut ilinniartitaanermi ilinniagassatut aaqqissuussinernut siunnersuutit pillugit oqaaseqarneranni oqaaseqaat ilaatigut ilinniartitaaneq nunani allani isiginnaartitsisartutut piginnaasaqalerfiussanersoq kiisalu ilinniartitaaneq Kalaallit Nunaanni avataanilu isiginnaartitsisartutut atorfinitsitsinissamut tunngatillugu inuussutissarsiutaasinnaasutut naatsorsuutigineqarnersoq siunnersuisoqatigiit naliliinerannik imaqassaaq. Siunnersuisoqatigiit oqaaseqaatissaminnut atugassanik immikkut ilisimasalinnit oqaaseqaasiortitsisinnaapput.

§ 5
Isiginnaartitsisartutut ilinniartitaanermik ingerlaavartumik naliliineq ukiumoortumik pisassaaq. Naliliineq ilinniartitaaneq ilinniartitaanermut malittarisassat ilinniartitaanermullu ilinniagassatut aaqqissuussat malillugit isumagineqarnersoq ilinniartitaanerlu naammaginartumik ingerlanersoq naliliinermik imaqassaaq.

§ 6
Siunnersuisoqatigiit isiginnaartitsisartutut ilinniartitaanermut malittarisassat allannguutissaattut tunngavilersuusikkamik siunnersuuteqarusuppata siunnersuut ilinniartitaanermut naalakkersuisoqarfimmut nassiunneqassaaq.

§ 7
Siunnersuisoqatigiit isiginnaartitsisartutut ilinniartitaanermut ilinniagassatut aaqqissuussat allanngortinneqarnissaannut tunngavilersuusikkamik siunnersuuteqarusuppata siunnersuut Kalaallit Nunaanni Isiginnaartitsisarfimmut nassiunneqassaaq.

§ 8
Pisariaqartitsineq naapertorlugu taamaattorli ukiumut ikinnerpaamik ataasiarluni Ilinniartitaanermut Siunnersuisoqatigiit ataatsimiinnissaannut siulittaasoq ataatsimiigiaqqusisassaaq.
Imm. 2. Ilinniartitaanermut Siunnersuisoqatigiit namminneq suleriaasissaliussapput.

§ 9
Ilinniartitaanermut Siunnersuisoqatigiit ukiumoortumik nalunaarusiortassapput Kalaallit Nunaata Isiginnaartitsisarfianut kiisalu ilinniartitaanermut naalakkersuisoqarfimmut ilisimatitsissutitut nassiunneqartartussamik.
Imm. 2. Ukiumoortumik nalunaarusiaq siunnersuisoqatigiit isiginnaartitsisartutut ilinniartitaanermik ukiumoortumik naliliinerannik, siunnersuisoqatigiit ukiumi qaangiuttumi suliaannik allaaserinninnermik siunnersuisoqatigiillu ukiumut tulliuttumut pilersaarutaannik, tassunga ilanngullugit ataatsimiittarnissamut pilersaarummik missingersuutinik imaqassaaq..

Atuutilersinneqarnera

§ 10
Nalunaarut manna 1. januar 2011-mi atuutilerpoq.

Namminersorlutik Oqartussat, ulloq 16. december 2010 
Mimi Karlsen / Lise Lennert Olsen

Siunnersuisoqatigiit ilaasortaat ukuupput: