Nunatta Isiginnaartitsinermik Ilinniarfia pisortassarsiorpoq Januarip aallaqqaataani 2019-mi atorfinittussamik
Nutaarsiassat Kingulliit

Nunatta Isiginnaartitsinermik Ilinniarfia pisortassarsiorpoq Januarip aallaqqaataani 2019-mi atorfinittussamik

Kinguaariit nikeriarnerisa tulliini inuussutissarsiutigalugu isiginnaartitsisartunngortussat sunneeqataaffigerusuppigit?

Ilinniarfimmi pisortanngortussaq ilinniarfiup nunatsinnilu isiginnaartitsinerup silarsuaanut attaveqqaataassaaq. Nunatta Isiginnaartitsisarfiata qullersaqarfianut ilanngutissaaq taakkualu saniatigut Nunatta Isiginnaartitsinermik Ilinniarfiani ilinniartitseriaatsit kiisalu eqqumiitsuliornermi suleriaatsit akisussaaffigissallugit. Nunatta Isiginnaartitsinermik Ilinniarfiata ilinniartui tallimaapput.

Maannakkut sulissutigineqarpoq ilinniarnerup tallinissaa ukiunut pingasunut kiisalu ilinniartunik arfineq-marlunnik tingusisinnaalernissaq, taamaalilluni ilinniagaq Bacheloritut naammassiffiusinnaanngorlungu.

Pisortanngortussaq isiginnaartitsisarfiup pisortaata ataaniissaaq, ukiumoortumillu ilinniartitaanermut siunnersuisoqatigiit ataatsimiileraangata ilaasortatut peqataatinneqartassalluni.

Akisussaaffiit

  • Ilinniarfimmi ulluinnarni aqutsineq taassumalu saniatigut ilinniarfiup aningaasaqarneranut akisussaasoq.
  • Ilinniarfimmut ilinniartitsisussanik pissarsiorneq kiisalu ilinniartitsisunut nakkutilliineq.
  • Nunatta Isiginnaartitsinermik Ilinniarfiani atuartisinernik pilersaarusiorneq aaqqissuussineq kiisalu naammassinninneq atuartitsinerup aaqqissuussaanera atuuttoq malillugu.
  • Ilinniartunik aqqutissiuussineq nalilersuinerlu.
  • Ilinniakkami sammisanik, atuartitsinerup aaqqissuussaanerata sannaanik kiisalu suliamut tunngasunik ineriartortitsineq.
  • Atuartut isiginnaagassiornissaannut kiisalu festivalinut workshop-inullu pilersaarusiorneq naammassinninnerlu.
  • Nunatsinni nunarsuullu sinnerani attaveqaatinut attaveqartuaannarnissaq nutaanillu attaveqarnikkut ineriartortitsinissaq.
  • Pisortatut atorfik tamakkiisuuvoq naatsorsuutaavorlu piffissap 35 %´ia ilinniartitsisutut atuutissasoq.

Piginnaasarisassat

Pisortanngortussamut piginnaassutsikkut piumasaqaatit.

  • Nutaanik pilersitsisinnaasoq, torersaartoq, piumassuseqqortooq.
  • Oqaatsitigut kalaallisut, qallunaatut tuluttullu piginnaasalik Inuit kalaallillu kultuurianik ilisimasaqarluartoq.
  • Isiginnaagassiornikkut misilittagaqarluartuullunilu ilisimasaqarluartoq, soorlu nammineq isiginnaartitsinikkut ingerlassaqarnikoq taassumalu saniatigut isiginnaartitsisartut suleriaasaannik assigiinngitsutigullu attuumassutilinnik suleqatigisinnaasaminik ilisimasaqartoq.
  • Eqqumiitsuliornermi takorluuilluarsinnaasoq, takorluukkaminillu ilinniartunut ilinniartitsisuinullu ingerlatitseqqissinnaasoq.
  • Ilinniarfimmik avammut nittarsaassilluarsinnaasoq isiginnaartitsineq ataatsimut isigalugu, kiisalu ilinniartunik isiginnaartitsinerup silarsuaanut attaveqalernissamut aqqutissiuussisinnaasoq.
  • Isiginnaartitsisarfiup qullersaanik, sulisuinik, ilinniartuinillu tigussaasumik torersumik nutaaliorpalaartumik ineriartorfiusumillu suleqateqarsinnaaneq sulisunillu aqutsinermik soqutigisaqarneq.

Iluaqutaassagaluarpoq ilinniartitsisareersimaguit kiisalu allaffissornikkut aqutsinikkullu misilittagaqartuullutit.

Atorfeqarnermut atugassat

Nunatta Isiginnaartitsinermik Ilinniarfiani pisortatut atorfik ukiunik sisamanik piffissaligaavoq sivitsoqqinneqarnissaanut periarfissaqarluni.

Akissaasersuineq atorfeqarnermilu atugassarititat immikkut isumaqatigiissutigineqassapput. Namminersorlutik Oqartussat ataani nuulernermi angalanermut pigisallu nassiunnerinut malitassat atuuttut malillugit akiliutsittoqarsinnaavoq.
Atorfimmut atatillugu inissaqartitsisoqanngilaq.

Atorfimmut tunngasunik paasiniaarusukkuit isiginnaartitsisarfiup pisortaanut Susanne Andreasenimut uku aqqutigalugit attaveqarsinnaavutit + 299 38 13 76 / +299 58 88 49, e-mail: susanne@nuis.gl

Qinnuteqarfissaq kingulleq: 5. december.

Atorfiniffissaq: Januarip aallaqqaataat 2019 immikkulluunniit isumaqatigiissussiornikkut.

Qinnuteqaat uunga nassiunneqassaaq: Nunatta Isiginnaartitsisarfia, Postboks 1627, 3900 Nuuk

mailikkulluunniit: susanne@nuis.gl