Pulaarluni isiginnaartitsineq: Angerlarsimaffeqanngitsoq -Qitiutigaluni isiginnaartitsineq
Nutaarsiassat Kingulliit

Pulaarluni isiginnaartitsineq: Angerlarsimaffeqanngitsoq -Qitiutigaluni isiginnaartitsineq

Meqqu arnaavoq angakkoq silarsuarmi angalasoq Kalaallit Nunaata kitaani nunaqarfeeqqameersoq. Taassumalu arnap angalanermini suliassarivaa angutip inuusuttup tarnera annaanneqarsinnaajunnaarnikoq utertissallugu. Angalanerminilu uiartererujussuarpoq tassanngaannarlu 1978-mut pivoq, qallunaat paarnaarussivianni ineeqqamiilluni. Ineeqqamilu angut inuusuttoq iterpoq.

Una isiginnaagassiaq inuttut inuunermi iluatsinngittuukkanut qaleriiaattunut tungasuuvoq, taamaakkaluartorli makeriaqqissinnaaneq inuunermilu siumut aallarsinnaaneq inuunermillu inuunererusutamik inuuneqalernermut tunngasuullunittaaq. Isiginnaagassiaq piviusuusaartitaavoq, Elisabethillu inuunermini misigisartagaanit nunatsinnilu kinguaariit akornanni naapinnernit qanga ullutsinnilu pisunit isumassarsiaalluni.

Isiginnaagassiaq inersimasunut tulluartuuvoq.

 

Qitinnermik, dramaturgi-tullu aaqqissuisoq : Ada Eino Jurgensen

Qitittoq: Elisabeth Heilmann Blind

Erinniortoq: Tuomas Rounakari

Jojk-ertoq: Lars Henrik Blind

Qaamanernik ilusilersuisoq (Qullilerisoq): David Andersson

Atisaliortut: Norlands teatret i Mo I Rana

Oqaatsinut siunnersorti: Inga Hansen

Immikkut qujaffigerusuppagut Kulturskolan Kiruna-miittoq, mentoriga Stina Yadav Olsson Kiisalu Urfolksspår.

 

Elisabeth Nunatsinni Sisimiuneersuuvoq, ukiulli 30-it Sverigep avannaani najungaqarsimalluni. Isiginnaartitsisartutut Tuukkaq Teaterimi Danmarkimiittumi 1983-miit 1988-mut ilinniarsimalluni, ukiuni taakkunani marluk Butoh Dance-mi kiisalu Japanimi Noh Theaterimi ilinniarsimalluni. Elisabeth isiginnaartitsisartutut kiinappalerlunilu qitittartutut sulisarpoq. Skandinaviami, nunatsinni nunarsuullu ilaani qitinnermik kiffaanngissuseqalersisisartunik kiisalu kiinappalerluni qitinnernik workshoppertitsisarpoq kiisalu qitinnermi peqqinnermilu saqqummiussisuni oqalugiartuusarluni. Elisabeth Giron Sámi Teáhter-imi sulisimavoq taassumalu saniatigut isiginaartitsisarfinni allani sulisarluni soorlu nunatsinni.

ISIGINNAARIARNEQ AKEQANNGILAQ!

Assiliisoq: Petvin Sandström