HOMO sapienne 2023

Nunatta Isiginnaartitsisarfia 2019-imi immikkut sammisaqarsimavoq pilersitsillunilu ilaatigut soorlu HOMO sapienne - Niviaq Korneliussenip inuusuttunut atuakkiaa nuannarineqarluartoq aallaavigalugu isiginnaartitsissutigalugu. Isiginnaagassiaq inuusuttunik inersimasunillu nuannarineqarluarpoq, tamannalu isiginnaagassiaq inuusuttunik inersimasunillu tigulluarneqarpoq tarrarsorfigineqarsimallunilu.

Taamani isiginnaagassiaq Ilulissani, Maniitsumi, Narsami, Nuummi, Qaqortumi, Qasigiannguani, Qeqertarsuarmi, Sisimiuni Aasiannilu takutinneqarpoq. Taamaalilluni sinerissamiit takutinneqaqqinnissaanut piumasaqartoqarpoq tamannalu maanna pilersikkusupparput. Pilersaarutaavoq Paamiunut, Tasiilamut, Maniitsumut aamma Sisimiunut septembarimi angalaartoqarsinnaassasoq aammalu ukiup sinnerani suli annerusumik tikissinnaanissamut periarfissaqarumaartoq.

Tamanut ammasumik isiginnaartitsisarnerit aamma atuarfinnut kollegianullu isiginnaartitsisarnerit tamarmik pilersinneqartarput. Tamatuma saniatigut Nuummi 'behind the show'-imik aaqqissuussinikkut pilersitsivugut.

Isiginnaagassiaq tassaavoq asanninneq, seksualitet, inuusuttuuneq, kinaassuseq, suiaassuseq , imminut nassaarineq, ikinngutigiinneq inuiaqatigiinnillu nalilersorneqarneq pillugit oqaluttuaq.

Uani isiginnaagassiami isiginnaartitsisartut isiginnaariartunut qaninnerutillugit isiginnaagassiaq. Taamaalilluni isiginnaartut isiginnaartitsisartunut qaninnerupput aammalu imminnut pissusilersuutaat misigisinnaalluarlugit. Isiginnaagassiaq iluatsilluarpoq aammalu ekstra dimension-imik tunniussivoq. Niviaq Korneliussen ilitsersuisorlu Hanne Trap Friis aamma isiginnaartitsisartoq Susanne Andreasen suleqatigalugit isiginnaagassiornermi itisuumik peqataasimavoq.

Isiginnaartitsisarfiup suliai tamarmik piviusunngortinneqarnissaanut aningaasat apeqqutaasarput. Takornariarnernut sivisuumik pilersaarusiortoqarpoq taamaattumillu pingaaruteqarpoq misileraaneq aallartisinnginnerani takornariarnermut aningaasaliisoqarnissaa qulakkeersinnaagatsigu.

Ukiut: 15+

Oqaatsit: Kalaallisut.

Takissuseq: 70 min. Missaani.

Ilitsersuisoq: Hanne Trap Friis.

Isiginnaartitsisut: Najattaajaraq Joelsen, Arnaq Petersen, Connie Kristoffersen plus 2 TBA. 

Nipilerisoq: Hans-Ole Amossen.