Nalunngilara Turné 2020

Nunatta Isiginnaartitsisarfia 2019-imi aasaanerani isiginnaagassiamik nutaamik pilersitsivoq. Isiginnaagassiarlu taanna inuusuttuaqqanut tunngatinneqarpoq aammattaaq imminut tatigineq, timeq, eqqarsartariaaseq, atoqatigiinneq aamma asanninnermut tunngatinneqarluni. Atuarfimmi klassinut angajullernut naleqqussarneqarpoq, taamaalilluni atuartut klassiminni saaffigisariaallugit aammalu naapisimaarsinnaallugit klassiminnilu isiginnaartitsineq ingerlallugu. Aggustimi septembarimilu isiginnaagassiaq Ilulissanut, Tasiilamut, Uummannamut Aasiannullu angallallugu periarfissaqarsimavugut. Taakkunanilu isiginnaagassiaq inuusuttunit tigulluarneqarsimavoq. Isiginnaagassiap kingorna apeqquterpassuaqarsimapput aammalu imminut tatigineq pillugu eqqarsaatersornissamut apeqqutinik siunnersuutinillu arlalinnik immersugassanik tunineqarlutik.

2020-p aallartinnerani isiginnaagassiaq kujataanut angallakkusupparput tassungalu periarfissanik tapiissutinillu qinnuteqarluta.

Inuusuttuaranngornermi timimik paasinninnissamut imminullu nassaarnissamut annertuumik ineriartortoqartarpoq. Ilaannikkut atisalersortariaatsimut pinnissusermullu anguniagaq ajornakusoorsinnaasarpoq, aamma ajornarsinnaavoq paasiniarlugu qaqugukkut asanninnermut atoqatigiinnermullu piareersimanerluni. Inuusuttuaqqat akornanni kinguaassiuutitigut tunngasunik pitsaasumik qitiutinneqarnissaat pisariaqarpoq, assersuutigalugu nappaatinut ilisimasaqarnerulernissaq, qanoq timikkut imminut illersorsinnaaneq, naameerneq ajunngittuusoq, ineriartornermi qanoq ittumik psykologiskimik tunngaveqarnersoq.

Isiginnaagassiaq Pillugu

Nalunngilara isiginnaagassiaavoq atuartut atuarfigisaanni pisoq. Niviaaluk Petersen, “Poorisa”-mi sulisoq atoqateqarneq pinaveersaarnerlu pillugu oqalugiartoq, ippassaammat angutaatiminik qimataasimavoq inuunera sequmilluni. Angutaatikuata tigoqqusimasaata akornanniipput Niviaaluup inuusuttuaraalluni allattaavikui, Niviaaluullu inuusuttuaraaneranut pulariasaarpugut.

Dramatikeri ilitsersuisorlu: Vivi Sørensen.

Isiginnaartitsisoq: Najattaajaraq Joelsen.

Teknik: Hans-Ole Amossen.

Angalanermi tekniskimi afvikler-eq: Pilutaq Lundblad.

Isumassarsiamut pilersitsisoq: Susanne Andreasen.

Producenti: Nunatta Isiginnaartitsisarfia.