Isiginnaariarnissannut paasissutissat

Piffissaq sumiiffillu misissukkit!

Isiginnaariartinnak isiginnaartitsinerup sumi ingerlanneqarnissaa piffissaalu misissukkit. Isiginnaartitsisarfimmi, kulturikkut illorsuarmi, atuarfimmi imaluunniit sumiiffimmi allami isiginnaartitsisoqarsinnaavoq. Paasissutissat isiginnaagassiamut pineqartumut nittartakkatsinni attaveqaqatigiittarfitsinnilu takuneqarsinnaapput.

Piffissaq sioqqullugu takkutiaarit

Isiginnaartitsineq aallartinnginnerani piffissaqarluarlutit takkunnissat innersuussutigaarput. Taamaalillutit isissutissat nassaarisinnaavat, inissannullu eqqissillutit ingissinnaallutit.

Billet-it isissutissallu

Billet imaluunniit isissutissaq pisariaqartinneqarpat, tamanna isiginnaagassiap paasissutissartaani allassimassaaq. Billet-inik tuniniaaneq isiginnaartitsiviup aaqqissuisulluunniit pineqartup aqqutigalugu ingerlanneqarsinnaavoq.

Assiliineq

Assiliineq aalasulianillu immiussineq isiginnaartitsinerup ingerlanerani inerteqqutaavoq. Assinik aalasulianillu facebookimi quppernitsinni kiisalu nittartakkatsinni peqartuaannarpugut. Isiginnaagassiaq naammassereeraangat ilaatigut isiginnaartitsisartut peqatigalugit assileqatigiinnissamut periarfissaqartarpoq.

Nipiliorneq

Isiginaartitsineq uummaarissumik eqqumiitsulioriaasaavoq. Taamaalilluni isiginaariaalluni misigisassaq immikkuullarittarpoq isiginnaartitsisut taama qanitsigalugit isiginnaarnermi. Taannalu misigissuseq illuatungaanuttaaq ingerlasarpoq – tassami isiginnaartitsivimmiit isiginnaariat takuneqarsinnaallutillu tusaaneqarsinnaammata. Taamaammat ataqqinnigit misigisaq nipituumik eqqartornaveersaaruk isiginnaartitsinerup ingerlanerani, eqqartuineq unillatsiarnermi isiginnaagassialluunniit naareernerani pisinnaammat. Aamma eqqarsaatigissavat mamakujuit puuisa nipiliorpallaannginnissaat kiisalu oqarasuaativit angallattakkap qaminnganissaa flight mode-miinnissaaluunniit nammineq isumagissagakku.

Unillatsiarnerit

Isiginnaagassiani takinerusuni takutitsinerup affaata tikinnerani unillartsiarnerit pisarput, tamannalu isiginnaartitsinerup aallartinnginnerani tamanut nalunaarutigineqartarpoq.

Sillimasoq

Isiginnaartitsinerup ingerlanerani ajortoqassagaluarpat isumannaallisaanermut akisussaasut sumi takutitsisoqarnera naapertorlugu assigiinngissinnaapput.

Nunatta Isiginnaartitsisarfiani takutitsisoqartillugu sulisut sillimasuusarput aammalu pisariaqarnerani isiginnaartunik ilitsersuisarlutik. Isiginnaartitsisarfimmi sulisut isiginnaartitsisarfiup ilisarnaataanik allalinnik tujuuloqartarput.

Allani, soorlu kulturikkut illorsuarni, atuarfinni imaluunniit angalanermi ornigulluni takutitsisoqartillugu, aaqqissuisut imaluunniit isiginnaagassiamik qaaqqusisut Nunatta Isiginnaartitsisarfianilu sulisut isumannaallisaanermut akisussaasuupput. Pisariaqartillugu taakkua ilitsersuutaannik malinninnissaq pingaaruteqarpoq.

Misigisat siammarteruk

Imaassinnaavoq isiginnaarninni eqqarsaatit assigiinngitsut pilersimasut ilaquttannut ikinngutinnullu eqqaartorusussinnaagitit?

Immaqaluunniit imaassinnaasoq plakatiliarput nuannarigit kusagigilluunniit?

Nunatta Isiginnaartitsisarfiata nittartagaatigut www.NUIS.GL kiisalu Facebookimi quppernernitsinnit UANI misigisat/isiginnaarsimasat siammartersinnaavat.