Allaanerulaartoq

Nunatta Isiginnaartitsisarfia inuussutissarsiutigalugu qitittartunit tikeraarteqarnera iluatsillugu ilaqutariinnut qanorluunniit ukiulinnut qitimmik takutitassiamik ”Allaanerulaartoq”-mik taaguutilimmik isiginnaariarnissaminnut tikilluaqqusaapput. Isiginnaagassiamik ilitsersuisuupput qitittartut Nuummi Kangillinnguit Atuarfianni 2.B-mi atuartut isumassarsiaannik assiinillu aallaavilimmik qititassiorsimasut. Inuit pissusaat assigiinngitsut, oqaluttuat, assit timimillu aalariaatsit aallaavigalugit ”Allaanerulaartoq” pilersipparput.  ”Meeqqat aamma isiginnaartitsinermi atisat ilusaat, tunuliaqutissat nipilersuutillu suunissaannik isumasiorneqarsimapput”, Isiginnaagassiami ilitsersuisoq Lava Markusson oqaluttuarpoq. 

Isiginnaartitsisut tassaapput qitittartut Michael Tang, Sarah Aviaaja Hammeken aamma Lava Markusson. Uumasut assigiinngitsut aalariaasai qitittartunit issuarneqassapput. Isiginnaariallu naatsorsuutigisinnaavaat ilaatigut naapissallugit, tuttut allaanerusut, isarukitsut aamma enhjørningi (tuugaalik) angakkuagaq. Imaassinnaavoq uumasut takutinneqartut aallaqqaammut ilisarnanngitsut aammami taanna pingaarnerpaangngilaq. Isiginnaagassiaq qanorluunniit paasineqarsinnaavoq isiginnaartussallu namminneq takorluulersinnissaat namminnerlu oqaluttualiorsinnaanissaat eqqarsaatersorsinnaanissaallu siunertaavoq.