Anaanat A/S

Inaarutaasumik H2018-2020-imi ilinniartuusup misilitsinneranut tikilluaritsi.

Nunatta Isiginnaartitsinermik Ilinniarfiata Nunatta Isiginnaartitsisarfia peqatigalugu tulluusimaarutigeqisaminik isiginnaagassiamut ilaseraasi. Pauline (Paaliit) Mølgaard ilinniartuunermini nalunaaquttap akunnera kingulleq naggaserlugu isiginnaartitsisartutut ilinniarsimasutullu minutsit siulliit atorlugit isiginnaagassiami takutitsissaaq.

Anaanat A/S (Casa Matriz)

Diana Raznovich tassaavoq arnat sapiissuseqarnerpaat quianartuliullaqqinnerpaat, titartakkallu atorlugit isiginnaagassiortartut, nangeqattaartuliortartut Argentiinami nuimanersaasa ilagaat. Juutitut angutinut arnanullu tamanoortuunera arnatullu nuimasuunera pillugu, Argentinami sakkutuut sakkut atorlugit pisaanermik tiguaanissaasa (1976-1983) ukioq sioqqullugu, inuartarineqarnissamik sioorasaarneqartarsimanermi kingornerisaanik nunagisaminit qimarngusutut nunami allami ukiorpassuarni inuusoq.

“Casa Matriz” (Anaanat A/S)-imi (1991) Gloria anaanatut taartsissamik inuuniutigalugu isiginnaartitsisartumik attartorpoq. Ilaatigut anaanat assigiinngitsut pissusaannik takutitsisussamik – anaanaq “ilungersortumiit” anaanamut inuussutissarsiortutut misigissuteqanngitsutut aanini qimallugu nunarsuarmi angalaannavissumut. Anaanat assigiinngitsut “panimik” nutaamik aamma pinngorartitsisarput. Diana Raznovichip takutinniarpaa inuiaqatigiinni, suut tamarmik tuniniagaallutillu pisiarineqarsinnaaffianni, avatangiisit inuunitsinnut qanoq sunniisinnaatiginerat, tamannalu eqqarsarnartumik quiasaartumilli aallaveqarluni saqqummiuppaa. Ilaqutariinni piorsarluarsimasut nunami kisermaassilluni naalakkersugaaffiusumik inuuneranni atugassaritinneqartut assigalugit, Diana Raznovichip pisunik ilungersunartunik quianartunngortitsineq aallaavigalugu oqaluttuaq saammivaa. Oqarpoq, “Kamannermiik naleqqiullugu illarneq atorlugu oqaaseqarsinnaanerusarpugut”. Isiginnaagassiaq kalaallisuunngortillugu siullermeerluni 2012-imi isiginnaartitsisartunit Makka Kleist-imit Else Danielsen-imillu, anaanatut panittullu inuttarineqartumik takuteqqaarneqarpoq, isiginnaarianit nuannarineqarsimaqisumik.

Isiginnaagassiortoq: Diana Raznovich

Kalaallisut nutsertisut: Makka Kleist, Else Danielsen, Tida Ravn & Majbritt Bech.

Ilitsersuisoq: Majbritt Bech.

Ilitsersuisumut ikiorti: Najattaajaraq Joelsen.

Isiginnaartitsisut isiginnaagassiamullu aaqqissuisut: Pauline Mølgaard & Kimmernaq Kjeldsen.

Qullilerisoq: Gerth W. Lyberth.

Isiginnaartitsiviup kiluanik, atortunik atisassanillu isumaginnittoq: Camilla Nielsen.

Aqutsisoq: Pilutaq Lundblad.

Mersorti: Nina Motzfelt Jensen.

Nipilersukkat nipilu: Gerth Lyberth.

Qitinnermik ilitsersuisoq: Ruth Montgomery-Andersen.

Siunnersortit: Patti Shaughnessy & Siri Langdalen.

Plakati programmilu: Gerth Lyberth.