Mikiseq

2012-imi Kalaallit Nunaat tamakkerlugu inuit 30-t sinneqartut imminorsimasutut nalunaarutigineqarput. Kalaallit nunaat 56.000-t missaannik inoqarpoq. Naak imminorsimasutut nalunaarutigineqarsimasut ukiuni kingullerni ikileriarsimagaluartut nunanut allanut naleqqiullugit amerlavallaaqaat. Nunatsinni inuit amerlassusaat naleqqiukkaanni agguaqatigiisillugu nunarsuatsinni amerlanerpaajupput. Danmarkimi imminortarnerit taama akulikitsigisuuppata ukiumut inuit 3000-t missaanniittut imminortassagaluarput. Danmarkimili ukiumut imminortartut taamaallaat 700-t missaannik amerlassuseqarput. 

Nunani issittuni pissutsit imminortarnermut tunngasut misissorutsigik paasissavarput imminortartut (imminoriartartullu) tassaasut angutit inuusuttut 15-t 30-llu akornanni ukiullit. Imminortarnerit "kultuureerussimanerup" kingunerisaanik  ilaqutariinnerup iluani attaveqarnerliornernik, imigassamik atornerluinermik kinguaassiutitigullu atornerlugaanermik taamaallaat tunngaveqartutut oqaatigineqarsinnaanngillat. Allaatiginnittarnerup takutippaa 1800-kunni aamma imminortoqartarsimasoq. Issittormiorpassuit akornanni imminortarneq tunngaviusumik pisinnaatitaaffittut isigineqarpoq, aammalu toqup kingornagut inunngoqqissinnaaneq sumiiffinni arlalissuarni suli upperineqarluni. 

Isiginnaartitsisartut Silamiut Teatret 2010-mi Sara Kane-p isiginnaagassiaa 4.48 "Psykose" takutippaat. Isiginnaagassiami tassani tarnikkut perulunnerit imminortarnerillu sammineqarput. 2014-imi Nunatta Isiginnaartitsisarfiata isiginnaagassiaq "Mikiseq" isiginnaartitsissutiginiarpaa. Isiginnaagassiaq taanna Kalaallit Nunaanni nunaqarfimmi arnap misigisimasaanik piviusunik tunngaveqarluni isiginnaagassiaavoq.

Qitittartut: 

• Marion Parrinello (Frankrig) 
• Alexander Montgomery-Andersen (Grønland) 
• Leopoldo Guadagno (Italien)

Koreografi: Ruth Andersen.

Nipilersuut: Benjamin Mørk.

Scenografi & atisaliortoq: Siri Langdalen.

Scenografimut ikiorti: Camilla Nielsen.

Ilitsersuisoq: Svenn B. Syrin.