Minik

Robert Peary-p kajummissaarineratigut umiarsuaanullumi ilaallutik Minik ataatanilu allallu avanersuarmioqatini sisamat ilagalugit qulaaluanik ukioqarluni 1897-mi New York-imut tikipput. Ukioq affarluunniit qaangiutinngittoq ataataa Qisuk toquvoq, kinguninngualu ilaqutariit pingasuusut, tassa arnaq, angut panillu, aamma toqullutik. Inuusuttoq Uisaakassak Minillu annattutuaapput, Uisaakassallu aasartoq avanersuarmut utermat Minik New Yorkimi kiserngorulluni. 

Miniup ataatani toqummat ilisoraa, ukiorpaaluilli qaangiummata paasilerlugu timaa napparsimaviup katersugaasivissuullu avissimagaat. Tamanna paasigamiuk attorterujussuarpoq inuttullu pissusai allanngorput. Angerlarsiloorluni aatsaat ukiut 12-it New Yorkimeereerluni angerlarnissaminut periarfissinneqarpoq. Uterpoq oqaatsini puiorsimallugit, takornatatut misigilersimalluni.   

Ukiut arfineq marluk nunamineereerluni septemberimi 1916 USA-mut uterpoq ukiorlu qaangiutiinnartoq puammigut nipputtoorluni toqulluni.

Nunatta Isiginnaartitsinermik Ilinniarfiani ilinniartut siulliit aasaru junip naalernerani naammassissapput, tassungalu atatillugu isiginnaagassiortussaallutik. 

Isiginnaartitsisut:

• Majbritt Bech
• Klaus Geisler
• Hans-Henrik Poulsen
• Mike F. Thomsen