Sila

Kalaallimit/qallunaamit qitittartumit Sarah Aviaja Hammeken-imit pilersinneqarsimasup AVIAJA DANCE-p isiginnaagassiaq SILA ulloq 20. januar Nunatta isiginnaartitsisarfiani Nuummiittumi isiginnaartitsissutigeqqaassavaa. 

Qitinneq uatsinnik katersuutsitsisoq 

AVIAJA DANCE-p SILA pillugu ima oqaluttuarpoq: Misigeriikkagut qiviarlugit tamatta sorsugassaqarnerput ersarinngila? Tamatta kiserliortutut misigineq nalunngikkipput, allanilli ikioqqunissaq pisariaqartinnerpaaleraangatsigu qinnutiginissaa sapernarnerpaajusartoq tamatta ilaa nalunngilarput? Ilaannikkut kissaatigineqarnerluta nalornissuteqaraangatta matut uatsinnut ammarartut takusinnaajunnaartarneri tamatta ilaa nalunngilarput?

Qanoq ikkaluaruttaluunniit suna anniaatiginerlugu eqqarsaatigiunnaarlugu anniaat qunusuilluta misigisariaqarparput. Ataatsimoorluta.

Taamaammat oqaluttuarineqartussamut ilagitigut, immap naqqani pisimasuutitamut, qitittut ilagalugit qilernerit ilassimasullu nikeriaqqinnissamut killilersuilersimasut qilerussaarneranni ilaajarnerinilu susoqassanersoq misissueqataallutit.

Isiginaartitsissut Sassuma Arnaa pillugu oqaluttuatoqaq aallaavigalugu takutitassiaavoq tamatta tamakkiisumik pisut aqussinnaannginnerinik eqqaasitsissutaasussaq. Inuttut tamatta ajornartorsiutitsinnik kisimiilluta aaqqiiniarnissatsinnut pinngortitaasimanngitsinnut  ersersitsisussamut. Misikkarissuulluta ataatsimoorluta avitseqatigiillutalu qitillutalu pissaagut. Kiserliorunnaaraangatta qanoq misigisarnerluta uterfigeqqilaassavarput.

Qitittartut pingasut isiginnaartitsivimmiipput, Amanda Rubio Sanchez (Spaniamiu), Marta Greco (Italiamiu) aamma kalaaleq/qallunaaq Sarah Aviaja Hammeken.

”Isiginnaartitsissut 2020-mili suliarisimavarput aamma maanna Nuummi illoqarfiit angerlarsimaffimma ilaanni isiginnaartitsissutigeqqaarnissaa assut qilanaaraarput”, oqarpoq Sarah Aviaja Hammeken. Tamatuma kingorna isiginnaartitsissut ilaatigut uani takutinneqassaaq Dansekapellet, Københavnimi.”

Isiginnaartitsissutip saniatigut isiginnaariat aamma qitittartut pingasut Kulturip Unnuani ulloq 21. januar naapissinnaapput, Nunatta Isiginnaartitsivia akeqanngitsumik kikkunnut tamanut ammassammat, tassani qitittartut workshoppertitsinissamut nal. 14 aamma nal. 15 tikilluaqqusipput.

Nunatta Isiginnaartitsiviani pisortaq Susanne Andreasen oqarpoq ”Sarah Aviaja Hammeken qitittartutut nukittoorujussuartut qitinnermik isiginnaartitsinernit assigiinngitsunit ilisimasarivarput, aamma nalunngilarput isiginnaartitsissutiliai pitsaassuseqarluartuusartut. Assut nuannerpoq siullerpaamik takutitseqqaarfigerusussimammatigut.”

Peqataasut aaqqissuisullu 

Qitinnermik ilusilersuisoq: Sarah Aviaja Hammeken. 

Qitittartut: Amanda Rubio Sanchez, Marta Greco & Sarah Aviaja Hammeken.  

Erinniortoq: Gerth Lyberth. 

Qullernik ilusilersuisoq: Brian Cord’homme. 

Aningaasaliisut aamma suleqatit/nioqqutissioqatigisat:

Dansehallerne, Nunatta Isiginnaartitsisarfia, Statens Kunstfond, NAPA, NunaFonden, Augustinus Fonden, William Hansen Fonden, William Demant Fonden, C.IN.E (Centre d'Investigació Escènica).