Angakkussaq 2022

Inuusuttunut inersimasunullu 'coming of age'-mik isiginnaagassiaq Nunatta Isiginnaartitsisarfianit isiginnaagassiarineqaqqilerpoq. Tamatumuuna isiginnaartitsisartutut ilinniartut Nunatta Isiginnaartitsisarfiata Ilinniarfimmeersut isiginnaartitsisartoqatigiinnut ilaallutik.

Angakkussaq - inuusuttunut qulingiluanik ukiulinnut isiginnaagassiaq tassaavoq oqaluttualiaq Those Who Run in the Sky, Canadami Inuk atuakkiortumit Igloolimmiit Aviaq Johnston-imit atuakkiarineqarsimasoq. Pitu angakkutut pisinnaasaminik atuinissamut ilinniartoq uani isiginnaagassiami pineqarpoq. Isiginnaagassiaq timitalersortupilussuuvoq pissanganartuliaq, Pitullu inersimasunngornermi angalaarnera takutinneqarluni; tassani angerlarsimaffimminut uterniarnini anersaat, uumasut, qimmit qimuttullu naapittarpai. Isiginnaagassiaq inuit oqaluttuarisaanerannik angalaneruvoq naak Nunavummi Igloolik eqqaani pisimagaluartoq taamaattorli aamma maani Kalaallit Nunaanni pisimasinnaagaluarpoq. Inuit kulturiannik tunngaveqartumik fantasi-mik suliaqartup isiginnaartitsineq misigiuk.

Isiginnaartitsineq Nuummi takutinneqarpoq kingornalu Canadami angallanneqarluni tassani Alianait Art Festival 2022-mi tusarnaartitsinissamut qaaqquneqarluni.

Pisortaq: Patti Shaughnessy (CA).

Timikkut aalanermik ilinniartitsisoq: Bill Coleman.

Isiginnaartitsisartoq: Josef Tarrak-Petrussen.

Isiginnaartitsisartutut ilinniartut: Milla Marie Petersen, Salik Gudmundsen Lennert, Dina Fisker Sandgreen.