Jazz Jim Milne Trio

Jazzimik tusarnaartitsineq Jim Milne Trio nipilersortoralugit– nipilersortartoq ilisarisimaneqarluartoq Titken Jakobsen pulaartoralugu

Nunatta Isiginnaartitsisarfia kingullermik tusarnaartitsineq iluatsilluarsimaqisoq ingerlateqqillugu isaarissami Jim Milne Trio nipilersortoralugu tusarnaartitsinissamut aggersaaqqippoq. Kingullermisuut nipilersoqatigiit pingasuusut appisimasaapput, unillatsiarnissallu tungaanut Titken Jakobsen saxofonertutut appisimaaqatigeqqaassallugu.

Jazzimi appisimaarneqakkajuttut amerlanernillu ilisarisimaneqarluartut  taavalu Jim Milnep nammineq erinniai atorneqarumaarput. Appinnerit akunnerini Jim jazzimik nipilersortuusarsimanerminik eqqaamasalikkersaaginnarani appinneqartussat ilisaritittarumaarpai.

Jazz mumisitsiniat akerliuniallu sinnerlugit nipilersoriaasiunngikkaluarluni nipilersoriaatsip ilisarnaataasa annerpaartaat naqisimaneqarnermiik kaanngarusussutsimik oqariartuuteqartuupput. Nipilersoriaasuivoq sungiusaqqaagaanngitsunik malaatiinnarlugu erinnikkanik imaqartoq tamatigullu appisimaagaq assigeeqqissaamik atorneqaqqittannginnera taassumunnga ersiutaalluni. Taamaalilluni ilisimaneqanngitsup nipilersortumit tusarnaartumiillu misissortuarneqarnissaannik kaammattuutaalluni.  

Nuummi aallaaveqarlutik jazzimik appisimaaqatigiit Titken Jakobsen (saxofon), Jim Milne (piano), Fabrizio Barzanti (el-bas) og Jonas Nilsson (tumerparpaat) sumik sammiveqarani imaluunniit aaqqissuussaalluartup, pissaaneqarnerup kusanassutsillu akunnerisigut nipilersukkamikkut tusarnaartoq uppitsaaliorniarsaralugu aallaqqaataaniik naanissaanut ikaarteriaraluassavaat.  

Ukiuni 150ini kingullerni jazzip ilisimanngisat misissorsimanngisallu naliginnaasunngortittuarsimavaat nunarsuaq tamakkerlugu tusarnaartartunut nipilersortartunullu. Massakkut nipilersoriaatsimut taassumunnga Nuummit appisimaarsinnaasut kalaaleq, ameerikkarmioq, qallunaaq, itaaliarmiorlu katerullutik appisimasaapput ataatsimoorsinnaassuseq qaffasinnerusoq qiteriinnarnagu tusarnaartitsinermikkut ersersillugu.

Ullorornerani nuannersumik tusarnaartitsinissamut aggersaavugut nipilersuutit nuannersut nipilersullaqqissorsuillu katinneranni appisimaakkatigut erinnnersuutitigullu pitsaalluinnartunik misigisaqarumasunut.